=" /> الساحرة الشريرة: هلوسه مع النفس

الجمعة، ٤ أبريل ٢٠٠٨

هلوسه مع النفس


انا: هتشتركي في الاضراب
نفسي:اضراب ايه
انا:انتي مسمعتيش عن اضراب 6 ابريل
نفسي:وضحي شويه
انا:في اضراب عام يوم 6 ابريل للبلد كلها
نفسي: انتي اتجننتي يا بت مش ممكن الحكومه تعمل اضراب
انا:ههههههههه دة تحالف الشعب كله اعتراض علي الاوضاع المهببه اللي احنا فيها هي الحكومه هتعترض علي نفسها
نفسي:الشعب هو البلد والبلد هي الحكومه والحكومه هي الحزب الحاكم اللي حاكم قبضنه علي البلد كلها ودة هو الواقع
اللي يتعمل يتعمل الامور مش هتتغير الكل مغلوب علي امرة وبيقول وانا مالي الخوف ملا قلوبنا تعرفي ليه
علشان الناس جعانه والجميع اصبح يشغله لقمه العيش وبس
وبعدين احنا مش محتاجين اضراب ساعه او يوم احنا محتاجين ثورة اصلاح شامله
انا:اهي رساله تفول احنا هنا ارحمونا تعبنا كفايه
والعيار اللي ميصبش يدوش
نفسي:الشعب نايم ممكن تقوليلي كان فين في انتخابات الرياسه
وقالوة منعرفش غيرةواللي حاول واتكلم اترمي ورا الشمس
احنا ايدينا مشلوله
انا: يمكن 6 ابريل دعوة اننا نفوق ونصحي
نفسي: كان غيرك اشطر الحمكومه لن تسمح لكي او لغيرك واللي يحاول في اماكن انتي عارفاها الداخل مفقود والخارج مولود
انا:بيقولوة يا واكل قوتي يا ناوي علي موتي
نفسي:هههههههه دة كلام بنقوله لبعض ومع بعض انما الحكومه عندها شعار
اتكلم واغضب ما شئت ولكني دائما افعل ما اشاء
انا:قصدك الكلاب تعوي والقافله تسير
نفسي: بالظبط
انا: طيب عاجبك اولادنا اللي بيتبهدلوة برة وجوة
عاجبك اضرب في بلدي برصاص امريكي امال لو برة هيعملوة فينا ايه
ارواحنا رخيصه ليه
جنودنا علي الحدود بيموتوة ليه
وكل اللي بنعمله بنشجب وندين
ارواحنا هانت علينا فبقت ملهاش لازمه
نفسي: بس الاضراب بالشكل دة هيعمل ايه80%من الناس تحت خط الفقر
يعني ميهمهاش غير الشاي والسكر والتموين ورغيف العيش
الناس دي عايزة جد يعرفهم ويفهمهم ياتري احناعملنا دة
انا:الاضراب بدايه علشان يعرفوة
نفسي: ما هي دي المصيبه لما نبقي كام مليون او الشعب كله زي ايام السادات
محدش هيقدر يعمل حاجه بالعكس هيخافوة انما لما يبقوة الف هيبقي سهل السيطرة
عليهم ورميهم في السجو ن يعني ضرر اكتر منه نفع
انا: عندك حق الاضراب لازم يكون منظم معلن عنه مش النت وبس
نفسي:انا عاوزة اقولك كلمه اخيرة
انا واحد من الشعب وبحب بلدي جداااااااا وبخاف عليها
مش عاوز اكون مليونير ولا اسكن في فيلا ولا اصيف برة
انا عاوز اعيش كويس
وولادي يتربوة كويس
انزلي الشارع واسئلي اي حد الكل هيقولك
عاوزززززززززززززين نعيش
كانت معكم هاله ونفسها من امام مديريه الامن
اجرررررررررري

هناك ١٥ تعليقًا:

بطوط حبوب يقول...

الحوار ده دار بين كل واحد بيدخل النت ونفسه
هتضرب؟
وهتستفاد ايه؟
وفى حاجه هتتغير بجد؟؟
واجزاء اخرى
تحياتى على نموذج الاسئله الى حطيته فى البوست ومنتظر نموذج الاجابه

الساحرة يقول...

بطوط حبوب

الاجابه مش عندي لوحدي لازم تبقي

عندنا كلنا

سلوى يقول...

نفسي: كان غيرك اشطر الحمكومه لن تسمح لكي او لغيرك واللي يحاول في اماكن انتي عارفاها الداخل مفقود والخارج مولود
انا

أنا قلت كده .. قالو متشائمه

ماعلينا
أن غدا لناظره لقريب

مدونتك حلوة على فكره

دمتى بكل خير

الساحرة يقول...

سلوي

دة مش تشائم دة الواقع اللي احناعايشينه

تحياتي وشكرا لزوقك

الباحث عن الحقيقة يقول...

لا حول ولا قوة إلا بالله
كنتى بعقلك ايه اللى حصلك
خخخخخخ ضحكة خليجى هههه
ياااه كل ده بيحصل فى مصر ولسه فاكرين نحتج ونعمل اضراب
عموما دايما اقول مش مهم نتأخر
المهم اننا فى الاخر نتحرك ونعمل حاجة
فعلا من كتر ما سكتنا بقينا ملطشه كل شوية يعملوا فينا اللى عايزينه
اهو نجرب الاضراب ونشوف هيحصل ايه
بس على فكره
الحكومة هتفضل هى الحكومة
والحزب الحاكم هيفضل هو الحاكم
وان مشي نظيف وجه غيره ياما رؤساء وزراء اتغيروا في مصر ..ومن سئ الى اسؤ
المكشله فى الدماغ
افهميها بقي
ولما تفهميها حصليني
او اقولك اجررررري دلوقتي وابقى افهمي بعدين

الساحرة يقول...

الباحث عن الحقيقه

دة انت منتشر في كل الاماكن
كل ما اروح مكان الاقيك

ما انافهماها امال بجري ليه

الباحث عن الحقيقة يقول...

مانتي كمان قاعدة على باب المدونة اهو
لزمته ايه بقى تقطيع الارزاق ده
بقيت خايف ادخل مدونتى من ساعة ما قلتى انك اجازه ولازقه في المدونة
ههههههههههه
بهزر طبعا
ربنا يكرمك
بس بلاش تمشي ورايا اهه وتيجي تقول منتشر في كل الاماكن ..انا هلبس طاقية الاخفاء بعد كده
خليكي هنا على باب المدونة ..جايز بتاع اللبن ييجى يخبط ولا حاجة

أحمد سعيد بسيوني يقول...

بسم الله
كلنا مضربييييين
تحياتي

Empress appy يقول...

ايه يا حبيبتى مش قولا نضرب مع نفسنا بتضربى فى مدرية الامن يا نهار ملخبط
انتى كنتى نايمه صح
بصى راى فى الموضوع ده مع انى هعمله وهضربوهقعد اغنى فى البلكونه يا بهيه وخبرينى الى اخر الاغنيه

بس كلمه واحده يا خوفى من الاسد على الفأر
حل الفزروة مين الاسد ومين الفأر

الساحرة يقول...

الباحث عن الحقيقه

لبن هي حصلت

انا اصلا بنزل اشتري اللبن مش اللبن هو
اللي بيجي اصله ميعرفش الطريق



احمدسعيد بسيوني


كلنا مضروبين مش مضربيين


appy

يا حبيبتي ما انا هضرب نفسي قصدي
مع نفسي و مديريه الا من جات لوحدها
ههههه
بتيجي من غير عزومه

انا كمان هقعد في البلكونه اغني

وانا كل ما اقول التوبه يا بوي

ترميني المقادير

دي فزورة سهله احنا الاسدطبعا

والفار عارف نفسه

كلمه في سرك العكس صحيح

الربان يقول...

تحياتي يا هالة

حوار بسيط و لكنه يخفي صراع...بين المفروض أو المأمول و الواقع الذي نعيشه....

بصراحة شديدة... نحن ( الشعب ) جزء كبير و مهم مما نحن فيه...نحن تسببنا في
اشتداد قسوة الحياة علينا...نحن المحتكرون...نحن تجار السوق السوداء..نحن الذين لا يؤدوا واجباتهم مقابل الاجر
الذي ارتضوه...نحن الذين نعرقل مصالح
الاخرين لاسباب معروفة و ايضا لاسباب غير معروفه...

لست مع الحكومة...و لا مع الحزب الوطني الذي في رأيي انه أضعف البلد و الاحزاب الأخري حتي يبقي هو المسيطر و الحاكم...

و لكن ايضا لا بد لنا جميعا ان ننظر الي انفسنا...اين ذهب التراحم و المحبه
بين الناس...اين ذهبت القيم و المباديء
القويمة... تركناها وراء ظهورنا..

قال تعالي " إن الله لا يغير ما بقوم حتي يغيروا ما بأنفسهم " صدق الله العظيم.

علي فكرة....حمدا لله علي فراراك من امام مديرية الأمن...و الا...كان زملاؤك
المدونين اعتصموا بعيش و حلاوة حتي الافراج عنك...


دمت بالف خير.

A.M يقول...

ايه ياعم السياسه دى انا كده هااخاف منك احنا مانعرفش حاجه ماشوفناش حاجه انا راجل بحب السهر والفرفشه وماليش فى السياسه خالص ..... باى باى ... تاكسى

A.M يقول...

اللهم إني أسألك الصبر عند القضاء ، و منازل الشهداء ، و عيش السعداء ، و النصر على الأعداء ، و مرافقة الأنبياء، يا رب العالمين

Unknown يقول...

حوار حلو
بس السؤال اليوم عملتى اية روحتى ولا لاء

مدونة حلوة بالتوفيق

الساحرة يقول...

الربان

ان الله لا يغيرما بقوم حتي يغيروة مابانفسهم



احمد


نورت المدونه

اللي يخاف يطلع برة


نهر الحب


ياريتني كنت روحت

كان نفسي اكون في المحله

بس هما قالوة خليك في البيت