=" /> الساحرة الشريرة: القضيه

الثلاثاء، ٨ أبريل ٢٠٠٨

القضيه



القضية


الحكاية والرواية


و القضية والجناية


و الفانلة ف الجونلة


و المخدة ف الملاية


و الارادة بالشطارة


و الخسارة


ع التكايا

و الأمين مهلباتي


و الأمانة مهلباية

و الصحافة مهلبية

و الاذاعة يا ضناية

ألف ليلة وليلة تندب

ع الهوى و تقول هوايا

ف الفساد

يهدي الهدايا


و القناعة للجواعى

و البضاعة للهبايا


و البوليس ف اليغمة

طايح بالطبنجة و العصاية


من غير كمامة

يهبش التوب و العباية


و القضية

يا قضايا بالمكايد و الوشايه

دبروها و فصلوها بالمقاس


لبست قضايا

و العدالة بالندالة

عطلوها و هي جاية

و الحكاية و الرواية

و القضية و الجناية


الحكاية عايزة قعدة


و الكلام ملوش نهاية


الحكاية ان البلد


مش ملك ناسها

و الخلايق ف البلد مش مالكة راسها


و البلد أصلا بلدنا مش عليلة





البلد علتها جاية


من خرستها

شوف يا صاحبي

ما انت شايف كل حاجة

بس خايف


الحقيقة بنت كلمة


و الكلام لازم يدور


سندباد مواله عالي ف المداين .. و الكفور


الكلام الكلام يكسر القيد و اللجام


الكلام الكلام يدفع الناس للأمام

شوف يا صاحبي هي كلمة

دايرة ف وسط الزحام

البلد مش عايزة قعدة

و كل منهو بكلمتين

البلد عايزة المجاهدة

باللسان و بالايدين


كلنا و من غير معاهدة


للبلد علينا دين

يكبسونا يحبسونا

يضربونا كرباجين

البلد سامعة و شاهدة

و كل خرم قصاده عين



الشاعر



احمد فؤاد نجم

هناك ١٢ تعليقًا:

raspoutine يقول...

فكرتينى ببوست كنت كاتبه اسمه بلد محتاجة لملك
تحياتى

الربان يقول...

تحياتي

قصيدة جميلة...و اتفق ان بلدنا محتاجة مجاهدة...بالكلام... و اختلف مع ماورد فيها من مجاهدة باليدين إن كان القصد باليدين هو اعمال عنف او شغب...لان ذلك سيولد فوضي...يصعب بعد ذلك السيطرة عليها...

بلدنا محتاجة مجاهدة منا جميعا...كل في مجاله و تخصصه...كل يجيد عمله و يبرع فيه
و يحتسب عند الله عمله...

بلدنا محتاجة تكاتفنا جميعا..لان ايد
وحدها لا تصفق.

تحياتي و تقديري...و اشكرك علي قصيدة المبدع أحمد فؤاد نجم.

دمت بألف خير.

Empress appy يقول...

احمد فؤاد نجم
محدش يقدر يعلق وراه يا حبيبة قلبى
بس تسلم ايديكى على الاختيار يا قمر

ba7re يقول...

القصيدة رائعة
فى بوست رائع
فى مدونة رائعة

و القضية لازم تتعاش
و ندافع فيها على المجنى عليها مصر


و سلام :)

الباحث عن الحقيقة يقول...

ما شاء الله
جميله اوى طبعا
فكرتينى بايام احمد فؤاد واغانى الشيخ امام كنت منزل منها كتير لكن راح مع الفورمات
واضح ان حال البلد زى ماهو
من السبعينات لغاية دلوقتى
يااااه كل ده والقضية هى هيا
على رأي معمر القذافي : مفيش فايدة
السلام عليكم

الربان يقول...

تحياتي

نفتقد مشاركاتك...و نفتقد موضوعاتك
يارب تكوني بألف خير.

تحياتي

الباحث عن الحقيقة يقول...

اللهم اجعله خير
فينكم يا فندم
ايه سبب الغياب
لعلك بخير ان شاء الله
اخوكم الباحث
نتمنى نطمن عليكم قريبا

Ehab يقول...

احمد فؤاد ده مصيبه
الكلمات جميله وموجعه قوي

تسلم ايدك يا ساحره
تشكري على القصيده التحفه دي
سلاااااااااااااااااااااااااااااام

Ehab يقول...

احمد فؤاد ده مصيبه
الكلمات جميله وموجعه قوي

تسلم ايدك يا ساحره
تشكري على القصيده التحفه دي
سلاااااااااااااااااااااااااااااام

الساحرة يقول...

raspoutine


دي بلد محتاجه بلد



الربان

اشكرك جداعلي السؤال انا النت كان مقطوع عندي

ولسه جاي

احمد فؤاد كان ولا وزال اشعارة تصلح

لكل الاوقات

الساحرة يقول...

appy

لا انا سمحتلك تعلقي وهو انتي شويه

يا قمر


ba7re

اشكرك اكيد القضيه لازم تتعاش

الساحرة يقول...

الباحث عن الحقيقه


انا عندي كل اغاني الشيخ امام

لوعاوزها انا طبعا مش هدهالك

هههههههههه

اشكرك علي السؤال عني النت عندي

كان مفصول واحنا بخير والحمدلله وسلامي

الي جميع من يسئل عني ههههههههه


الشنكوتي الكبير


تسلم ايد كل اللي حاسس بالقضيه وبيحاول يحلها